د معمار پرس د خبر له مخې؛ طالبانو د سې شنبې په ورځ (د حمل ۲۶مه) په یوه خبرپاڼه کې ویلي دي چی د طالبانو سیاسي مرستیال مولوي عبدالکبیر دا ادعا له یو شمېر طالب چارواکو او قومي مشرانو سره په لیدنه کې کړې ده چی په افغانستان کې له ۲۵ کلونو وژنې وروسته هر افغان حق لري چې ژوند وکړي او خپلې خوښۍ ولمانځي. خبرپاڼه زیاتوي، چې قومي مشرانو او علماوو د اختر په ورځو کې د امنیت له تامین څخه خوښي څرګنده کړه او له اړوندو مسوولینو یې مننه وکړه. دوی وویل چې خلک د طالبانو له چلند څخه خوښ دي او زیاته یې کړه چې له طالبانو سره هر ډول همکارۍ ته چمتو دي. طالبانو ادعا کړې چې د امنیتي ځواکونو او ولس ترمنځ د ښې همکارۍ او همغږۍ په پایله کې به له اختر وروسته هم د امنیت د تامین لپاره هڅې وکړي.