د طالبانو د عدلیې وزارت چارواکي اعلان وکړ چې د دې ډلې مشر د تطبیق لپاره اووه قوانین تصویب کړي او ۱۶۲ نور قوانین به یې لاسلیک کړي. د طالبانو د عدلیې وزارت د قوانینو رئیس فضل هادي صاحب‌زاده زیاته کړه چې د شکایتونو د اورېدو او د سوالګرو د راټولولو قانون یو له هغو قوانینو څخه دی چې د طالبانو د مشر ملاهبت الله اخندزاده له خوا تصویب شوی دی. صاحب زاده ټینګار کړی چې په افغانستان کې د پخواني حکومت قوانین لغوه شوي دي. هغه وايي، چې د طالبانو مشر د قوانینو جوړولو او ترتیبولو ته ډېر اهمیت ورکوي او د همدې لپاره یې د خپل ځان په مشرۍ یوه شورا جوړه کړې ده.