په جنیوا کې د افغانستان استازي نصیر احمد اندېشه د چهارشنبې په ورځ (د حمل ۸ مه) د ملګرو ملتونو د بشري حقونو د شورا په غونډه کې دا څرګندونې وکړې چی په فلسطین کې د تلپاتې سولې د رامنځته کولو لپاره، دا اړینه ده چې نړیوالو قوانینو ته درناوی وشي او د “شخصي حقونو او وقار” ساتنه وشي. هغه ټینګار وکړ نړۍ باید د غزې د خلکو په قتل عام او بې انصافۍ سترګې پټې نه کړی. په ورته وخت کې، په اشغال شوي فلسطیني سیمو کې د بشري حقونو په برخه کې د ملګرو ملتونو ځانګړې رپورټرې فرانچیسکا البانزه اسراییل په غزه کې په “نسل وژنه” تورن کړل. په هرصورت، اسراییل د راپور محتوا رد کړه او دا یې د “نسل وژنې کنوانسیون ښکاره تحریف” بللی، مخکې له دې چې ځانګړي راپور ورکوونکي د خپلو تحقیقاتو پایلې حاضرو هیوادونو ته وړاندې کړي.