د امریکا د ولسي جرګې د بهرنیو اړیکو د کمیټې مشر مایکل مک کال، په ​​افغانستان کې د امریکا د سفارت د شارژدافیر کیرن ډیکر د هغه پیغام په ځواب کې چې ویلي یې وو، د افغان مدني ټولنې غړي له طالبانو سره د سیاسي لارې نقشې او تعامل ملاتړ کوي، وویل: له طالبانو سره د هر ډول خبرو اترو وړاندیز د افغانانو پر مخ یو ګوزار دی. هغه د افغانستان خلک د طالبانو د رژیم قربانيان بللي دي. هغه د بایډن له حکومت څخه وغوښتل چې په هیڅ ډول شرایطو کې له طالبانو سره خبرې اترې ونه کړي. د مارچ په اتمه په افغانستان کې د امریکا د سفارت شارژدافیر د ترکیې په استانبول ښار کې له یو شمېر افغانانو سره خپله ناسته اعلان کړه او لیکلي یې دي چې په نړیواله ټولنه کې د افغانستان د بیا یوځای کولو لپاره د ملګرو ملتونو په مشرۍ د پروسې لپاره د مدني ټولنې د استازو ترمنځ قوي ملاتړ شتون لري. په داسې حال کې چې امریکايي چارواکي د افغانستان د روان وضعیت اصلي عامل دي، د طالبانو پر وړاندې د افغان ولس د ملاتړ خبره کوي. څه هم په ځینو قضیو کې د امریکا د ځینو چارواکو تر منځ د نظر اختلاف موجود دی، خو له ولسونو او حکومتونو سره د هغوی چلند دا ثابته کړه چې دغه هېواد له نورو سره خواخوږی او مهربانی نه لری. د دوحې د تړون په لاسلیکولو او له افغانستان څخه په عاجله توګه په وتلو سره د بایډن حکومت د افغانستان د جمهوري ریاست سقوط ته لاره هواره کړه. د افغانستان اوسنی وضعیت چې له خلکو او نړۍ سره یې د هر ډول تعامل لاره تړلې، د امریکایی چارواکو د غیر مسوولانه سیاستونو محصول دی او باید په دې برخه کې له دوی سره حساب کتاب وشي. هغه کسان چې د دې کړکېچ په رامنځته کولو کې یې رول لوبولی، باید د خپلو کړنو د جبران لپاره یوه لاره ولټوی؛ ځکه دې ناسمې محاسبې په هېواد کې سیاسي کړکېچ رامنځته کړی دی.