د معمار پرس د خبر له مخې، په افغانستان کې د ملګرو ملتونو د بشري چارو د همغږۍ دفتر (OCHA) پرون یکشنبه (د ثور ۱۶مه) په افغانستان کې د اړمنو کسانو لپاره د یو شمېر مرستو د کمولو د احتمال خبرداری ورکړی دی. د ملګرو ملتونو د بشري چارو د همغږۍ دفتر په وینا، د اپریل او جون ترمنځ، د سرپناه، روغتیایې، خوراکي توکو، تغذیې، ساتنې او تعلیم ځینې حیاتي سرچینې د قطع کیدو له خطر سره مخ دي. دا په داسې حال کې ده، چې تر دې مخکې ملګرو ملتونو په یوه راپور کې اعلان کړی و، چې تر ۲۰۲۴ کال پورې به د افغانستان تر نیمايي ډېر وګړي په یو ډول نه یو ډول بشري مرستو ته اړتیا ولري.