د طالبانو د روغتیا وزیر قلندر عباد ادعا کړې چې د دې ډلې حکومت د ښځو د حقونو خلاف نه دی او دا مهال ۱۵۰ زره ښځې په روغتیا او ۲۰۰ زره د پوهنې په برخه کې کار کوي. دا په داسې حال کې ده چې رښتینې او تایید شوې احصایې د دغه طالب چارواکي د ادعا برعکس ثابتوي. قلندر عباد د مالیزیا ټلویزیون “استرو اواني” په یوه غونډه کې ادعا وکړه چې د طالبانو حکومت “د ټولو ښځو لپاره دروازې خلاصې ساتلې” ځکه چې د ده په وینا د ښځو له ګډون پرته د ټولنې اداره کول ستونزمن دي. دغه طالب چارواکي په دغه غونډه کې ادعا کړې وه چې اوس مهال د طالبانو تر واک لاندې افغان ښوونځیو کې شاوخوا دوه سوه زره ښځینه ښوونکې تدریس کوي. دا په داسې حال کې ده چې د رسمي شمېرو له مخې په ۱۴۰۰ کال کې مخکې له دې چې طالبانو په افغانستان کې واک تر لاسه کړ او ټول نارینه او ښځینه ښوونکي یې په کار بوخت وو، د ښوونکو ټولټال شمېر شاوخوا ۲۲۰ زرو ته رسېده.