د سرپرست حکومت د مهاجرینو او راستنیدونکو چارو وزارت اعلان وکړ چې د مهاجرت د نړیوال سازمان (IOM) دفتر چهارشنبه د اسد ۱۸مه د کابل په هوايي ډګر کې پرانیستل شو. د سرپرست حکومت د مهاجرینو او راستنیدونکو چارو وزارت په اعلامیه کې راغلي چې له اوس به د الوتنو له لارې د راستنیدونکو د ثبت لړۍ په ګډه ترسره کیږي. تر اوسه معلومه نه ده چې د مهاجرت نړیوال سازمان له راستنیدونکو افغانانو سره مالي مرسته کوي او که نه. د کابل په هوايي ډګر کې د مهاجرت د نړیوال سازمان دفتر د تېر حکومت له سقوط وروسته سخت زیانمن شوی و او اوس له بیارغونې وروسته بېرته فعال شوی دی.