د طالبانو د اقتصاد وزارت نن (شنبه د جدي ۳ مه) په هېواد کې ټولو کورنیو او بهرنیو ادارو ته امر کړی چې تر بل خبرتیا پورې دې د ښځینه کارکوونکو فعالیت ودروي. په دې مکتوب کې راغلي: “د اقتصاد وزارت د خپل مسوولیت پر بنسټ ټولو موسسې ته لارښوونه کوي چې تر بل خبرتیا پورې به د ټولو هغو ښځینه کارکوونکو کار ودروي چې په خپلو اړوندو څانګو کې کار کوي.” د طالبانو د اقتصاد وزیر قاري دین محمد حنیف خبرداری ورکړی چې د دغه مکتوب له محتوا څخه د سرغړونې او ځنډ په صورت کې به د سرغړونکي بنسټ جواز لغوه شي. طالبانو د دغه کار لامل د حجاب او اړوندو قوانینو نه مراعات بللی دی. دا په داسې حال کې ده، چې طالبانو تر دې وړاندې هم په ښوونځيو او پوهنتونونو کې د ښځو له زده کړو منعه امر صادر کړی و. په افغانستان کې د زده کړو او کارموندنې د محدودیت په اړه د طالبانو کړنې د بشري حقونو د نړیوالو سازمانونو او د سیمې د هېوادونو له غبرګونونو سره مخ شوي او د بشري حقونو اکثرو سازمانونو له طالبانو غوښتي چې حکومت دې پر دې پرېکړې له سره غور وکړي. خو له دې سره سره نه یوازې دا چې په افغانستان کې پر ښځو محدودیتونه نه دي کم شوي، بلکې ورځ تر بلې په بېلابېلو ټولنیزو، فرهنګي او اقتصادي برخو کې پر ښځو زیات محدودیتونه او فشارونه اچول کېږي، چې د افغان مېرمنو د راتلونکي په اړه یې اندېښنې زیاتې کړي دي. دا ډول فشارونه نه یوازې دا چې په ټولنه کې ثبات او سوله نه راوړي، بلکې په ټولنه کې تاوتریخوالی او بې ثباتي هم زیاتوي، ځکه ښځې د افغان ملت یوه مهمه برخه ده، چې تل یې په بېلابېلو برخو کې د نارینه وو ترڅنګ ستر ګامونه اوچت کړي دي او لوی خدمتونه وړاندې کړی دی. ښځې د افغانستان د اوسنۍ ټولنې په پرمختګ کې خورا مهمې او د انکار وړ نه دي، دوی له کلونو راهیسې د ختیځ او لویدیځ د استعمار پر وړاندې د جګړې په ډګرونو او د لومړۍ کرښې تر شا فعال حضور لري او په هر ډول چې توانېدلي دي، د باطل پر وړاندې د حق د جبهې په فتحه کې يې رول لوبولی دی. اوس چې هېواد د لوېديځ او ختیځ له استعمار او استحصال څخه خوندي دی او تمه کېږي چې ټولنه به د پرمختګ، ودانۍ او هوساینې پر لور ګامونه واخلي، خو له بده مرغه د طالبانو د حکومت دا ډول کړنو دا هیلې په مایوسۍ بدلې کړې دي او روښانه راتلونکی لید بل لوري ته هواروي. طالبان باید دا ومني چې په بېلابېلو سیاسي، ټولنیزو، فرهنګي او اقتصادي برخو کې د ښځو له شتون پرته د یو هوسا او سوکاله افغانستان جوړول ناشونې دي ځکه ښځې بې سارې وړتیاوې او استعدادونه لري چې د ټولنې د پرمختګ سرعت د پام وړ زیاتوي او د هغوی له پامه غورځول ټولنې ته ستر او نه جبرانیدونکی زیان رسوي. د حجاب او شرعي معيارونو د مراعاتولو په اړه بايد دا هم وويل شي چې افغانې ښځې په اسلامي ټولنو کې تر ټولو پاکې او عفیفې ښځې دي او افغان مسلمانې ښځې د شرعي معيارونو د مراعتولو په مثبتو اغيزو او د اسلام د نه مراعاتولو په زيان خامخا پوهيږي. او د ديني ارزښتونو د ساتنې په لاره کې ګامونه پورته کوي، ځکه چې اساساً د اسلام سپېڅلي احکام په ټولنه کې د ښځو د لوړ مقام د ساتنې او د هغو هوس‌باز کسانو له جال څخه د ښځو د ژغورلو پرته چې د ښځو له توهین او د یوې وسیلې په توګه یې کارول بل څه نه دي رامنځته شوي او د همدغو ارزښتونو په ساتلو سره ښځي د پرمختګ او وقار لوړو څوکو ته ورسيږي، هغه څه چي د اسلام دښمنان او غربي فاسقان هيڅکله نه غواړي او په هره ممکنه طریقه غواړي چې ښځې په اسلامي ټولنو کې فحاشي او فساد ته راوبولي او په دې توګه پر اسلامي هیوادونه واک او تسلط پیدا کړي. له بلې خوا، په نامناسب چلند او د سختو تصمیمونو په نیولو کې د طالبانو فعالیت د دې لامل کیږي چې ښځې د طالبانو او اسلامي حکومت په وړاندې، چې دوی یې د قوانینو د پلي کولو ادعا کوي، مایوسه کړي. له همدې امله د طالبانو حکومت په ټولنه کې باید د ښځو مقام ته په پام او د دين د خپل سري د لوستلو پرېښولو سره او د ديني او انساني ارزښتونو پر بنسټ د معقولو تصميمونو په نيولو سره د ښځو له لاسه وتلي حقونه بېرته ترلاسه کړي او ټولنه باید له هغه اندیښنو څخه خلاص کړي چې رامینځته شوي دي.