د معمار وحدت د خبری آژانس د راپوړ له مخې؛ دا غونډه پرون جمعه (د سرطان په ۱۰مه) په جنیوا کې د ملګرو ملتونو د بشري حقونو د سازمان له خوا جوړه شوې وه او د بېلابېلو هېوادونو استازو پکې د افغان ښځو د حقونو په اړه ویناوې وکړې.

په دې شورا کې د ملګرو ملتونو د بشري حقونو د عالي کمېشنرۍ مشرې میشل باشله وویل، نن یو ځل بیا پر طالب چارواکو غږ کوم چې د ښځو دغه بېړنۍ غوښتنې دې ومني چې د خبرو مېز ته کېني او له هغوی سره په معنی داره خبرو کې برخه واخلي. “

هغه ټینګار وکړ چې که دا وضعیت بدل نه شي، د افغانستان راتلونکی به تیاره وي.

باشله کابل ته خپل وروستي سفر ته په اشارې سره زیاته کړه: «په کابل کې د ښځو له فعالانو سره د کتنې په ترڅ کې چې ما د دوی له خوا په زړه پورې پیغام ولید، روښانه و چې دوی د طالبانو له مشر حکومت سره مخامخ او مستقیم خبرې اترې غواړي. د دغو ښځو د غوښتنې د پوره کولو لپاره کار دوام لري.

د افغانستان لپاره د ملګرو ملتونو ځانګړي استازي ریچارډ بینیټ هم په دې غونډه کې په خپله وینا کې وویل: “د پخواني اسلامي جمهوریت څخه د واک د اخیستو په وخت کې د طالبانو تر واک لاندې سیمو څخه ترلاسه شوي معلومات ټینګار کوي چې د ښځو د رول کمول د دوی د ایډیالوژۍ مرکز دی.” د هغه په ​​وينا، په کم عمر کې ودونه او د ماشومانو ودونه، د تګ راتګ محدوديت او د نجونو پر زده کړو بنديز، د ښځو له اساسي حقونو څخه د نورو سرغړونو په ډله کې دي، چې طالبانو پلي کړي دي.

هغه وویل چې د ښځو په ځپلو کې د طالبانو کار په نړۍ کې بې ساری دی.

بینیټ په کابل کې د طالبانو د علماوو سترې غونډې ته په اشارې سره وویل چې په دې غونډه کې د ښځو استازیتوب نارینه وو.

هغه د نړیوالو فشارونو د زیاتولو غوښتنه وکړه، په ځانګړې توګه د هغو هیوادونو لخوا چې له افغانستان سره مرسته کوي، طالبان دې ته اړ کړي چې د بشري حقونو کنوانسیونونو ته غاړه کیږدي.

په دې غونډه کې د جرمني، نیوزیلنډ، هند او یو شمېر نورو هېوادونو استازو هم د طالبانو له خوا د افغان مېرمنو پر سیستماتیک فشار نیوکه وکړه او خبرداری یې ورکړ چې طالبان به د دې ډول کړنو په دوام افغانستان له خپل راتلونکي محروم کړي.

دوی د افغان ښځو او نجونو حقونو ته د درناوي غوښتنه وکړه او یادونه یې وکړه چې افغان نجونې باید له تبعیض پرته ښوونځیو ته ولاړې شي.

د دې ټولو معلوماتو له ارزونې وروسته، ټاکل شوې چې د ملګرو ملتونو د بشري حقونو شورا د جولای په پنځمه د یوه پریکړه لیک مسوده د میز پر سر واچوي او په دوو ورځو کې به یې په اړه پریکړه وشي.