د سرپرست حکومت د مالیې وزارت وايي چې په تېرو لسو میاشتو کې یوازې له دریو ولایتونو څه باندې ۴ میلیارد افغانۍ عواید راټول شوي دي.

دغه وزارت پر خپله رسمي فېسبوکپاڼه لیکلي چې دا عواید یې د پکتیا، تخار او نیمروز ولایتونو له ګمرکونو راټول کړي دي.

مالیې وزارت که څه هم د دغو عوایدو د راټولېدو لاملونه نه دي ښوولي، خو په وینا یې چې په یادو ګمرکونو کې له فساد سره جدي مبارزه شوې او دا لړۍ به په راتلونکي کې هم جاري وي.

د طالبانو د مالیې وزارت څه موده وړاندې ویلي وو چې په ګمرکونو کې په سوداګریزو توکو تعرفې لوړې شوې او د ګمرکونو چارې یې چټکې کړې دي.

په ورته وخت کې یو شمېر سوداګرو رسنیو ته ویلي چې په ګمرکونو کې پراخ فساد دی او په دې برخه کې د پام وړ ستونزې شته دي.