د ملګرو ملتونو علمي، کلتوري او ښوونیز سازمان (یونسکو) وايي، طالبانو د نجونو له زده کړو بې برخې کولو د هغوی خوبونه او هیلې له منځه وړي دي. دغه سازمان د يوې اعلاميې په خپرولو سره ويلي، چې طالبانو د نجونو او ښځو د زده کړو له اساسي حق څخه سرغړونه کړې او دا موضوع د منلو وړ نه ده. په افغانستان کې د ملګرو ملتونو ماموریت (یوناما) په خپل ټویټر اکاونټ کې په هیواد کې د ښځو د ویښتانو د ټولو سالونونو د بندولو حکم ته غبرګون ښودلی او له طالب چارواکو یې غوښتي چې د دغه فرمان د عملي کیدو مخه ونیسي او ټینګار یې کړی چې دا ډول پالیسي د هیواد اقتصاد ته زیان رسوي او د خلکو د حقونو د خوندیتوب په اړه د طالبانو له ادعاوو سره په تضاد کې دي. افغان میرمنې په دې باور دي چې د ویښتانو سالونونه چیرې چې میرمنې کار کوي او خدمات وړاندې کوي په بشپړ ډول د میرمنو چاپیریال دی او هیڅ ډول غیر قانوني کارونه نه ترسره کیږي. کارپوهان په دې باور دي چې د طالبانو له خوا له نړیوالې ټولنې د خبرو اترو د غوښتنې او پر ښځو د دوی د لګول شویو بندیزونو ترمنځ یو ډول ټکر دی. په بل عبارت، طالبان تل اعلانوي چې نړۍ باید له دوی سره ښې او کاري اړیکې ولري خو دوی پر ښځو د نویو محدودیتونو په رامنځ ته کولو سره په عملي توګه د تعامل او اړیکو جوړولو ته لاره بندوي. په دې اړه په کابل کې د ملګرو ملتونو (يوناما) د استازي مرستيال مارکس پوتزل وويل، چې د ارتباطي پل په توګه، دا سازمان په ډیرو برخو کې د طالبانو سره یوځای کار کوي ترڅو د دوی حاکمیت نړیوال انزوا پای ته ورسوي خو دا طالبان دي چې باید نرمښت او ښه نیت وښيي. هغه څرګنده کړه: “زه فکر کوم چې د طالبانو حکومت باید نجونې له شپږم ټولګي څخه پورته ښوونځي ته لاړې شي، نجونې پوهنتون ته لاړې شي او ښځو ته اجازه ورکړي چې د ملګرو ملتونو په ګډون په ملي او نړیوالو غیر دولتي ادارو کې کار وکړي. که داسې وشي، زه تصور کولی شم چې افغانستان به بیا له نړیوالې ټولنې سره یوځای شي او نړیوال مرستندویان به له افغانستان سره پر خپلو اړیکو له سره غور وکړي.” دا نظر یوازې تر ملګرو ملتونو پورې محدود نه دی، بلکې نړیوالې اجماع له طالبانو غوښتي چې د ښځو پر وړاندې بندیزونه او ممانعتونه لغوه کړي، ترڅو دوی د نړۍ د نورو دولتونو په څېر په ټولنه کې ګډون وکړي؛ خو د طالبانو او نړیوالې ټولنې تر منځ په دې اړه ګډ تفاهم نشته چې څنګه کولای شي له دې کړکېچ څخه د ښکېلو خواوو په هوکړې سره ووځي! طالبان هم باید دې تفاهم ته رسیدلي وي چې پر ټولو افغانانو او په ځانګړې توګه پر ښځو د ډله ییزو تګلارو له پلي کولو ډډه وکړي او د افغانانو له واقعیتونو او د نړیوالې ټولنې له شرایطو سره سم چلند وکړي که نه نو موږ د افغانستان د وضعیت د ښه کیدو تمه نه شو کولای.