د معمار پرس د خبر له مخې؛ په داسې حال کې چې پاکستان له اقتصادي او امنیتي ننګونو سره لاس او ګرېوان دی، د دغه هېواد په اوبو کې د تېلو او ګازو د سترو زېرمو د موندلو خبر د دغه هېواد د اقتصادي وضعیت د ښه کېدو هیلې زیاتې کړې دي. د پاکستان یوه جګپوړي امنیتي چارواکي ادعا کړې چې دغه کشف د پاکستان برخلیک بدلولی شي. د پاکستان د تېلو او ګازو د تنظیم د ادارې پخواني غړي محمد عارف د دې خبر په اړه خوشبیني څرګنده کړه او ټینګار یې وکړ چې د دې زیرمو د حجم او کیفیت په اړه لا تر اوسه ممکنه نه ده چې په ډاډ سره تبصره وکړو.