د معمار پرس د خبر له مخې؛ د طالبانو د پوځ لوى درستيز فصيح الدين فطرت له بريتانيا څخه د افغانستان د خپلواکۍ د نمانځنې پر مهال اعلان وکړ، چې د طالبانو تر واکمنۍ لاندې افغانستان په حقيقت کې خپلواک دى او افغانستان د چا امر نه مني. په دې مراسمو کې چې د یکشنبې په ورځ د اسد په ۲۸مه د ملي دفاع وزارت په انګړ کې ترسره شول، په تېرو حکومتونو د نيوکې ترڅنګ چې له بهرنيو هېوادونو يې امرونه اخيستل، ټينګار وکړ چې طالبان به هېڅ هېواد ته اجازه ورنه کړي چې د افغانستان په کورنيو چارو کې لاسوهنه وکړي. په همدې حال کې د طالبانو د صدراعظم د دفتر اقتصادي مرستیال ملا عبدالغني برادر هم د افغانستان د خپلواکۍ پر ساتلو ټینګار کړی دی. دا ښیي چې طالبان په داسې حال کې د خپلې خپلواکۍ خبرې کوي چې لا هم له امنیتي او نړیوالو ننګونو سره مخ دي.