په وروستیو کلونو کې له افغانستان څخه د تروریستي ګواښونو په اړه اندېښنې زیاتې شوي دي. په افغانستان کې د طالبانو له واکمنۍ سره دا اندېښنې زیاتې شوې او ویل کېږي چې په افغانستان کې ډېرې ترهګرې ډلې شتون لري او د طالبانو تر سیوري لاندې فعالیت کوي. په دې وروستیو کې د امریکا د بهرنیو چارو وزارت د ویاند مرستیال ویدانت پاټیل ویلي، چې امریکا په سیمه کې له خپلو ملګرو سره کار کوي، څو له افغانستان څخه نورو هېوادونو ته د داعش او نورو وسله والو ډلو د ګواښونو د خپرېدو مخه ونیسي. تر دې وړاندې د ملګرو ملتونو امنیت شورا هم په یوه راپور کې په افغانستان کې د داعش د پاتې کېدو خبره کړې وه. هغه ادعاوې چې طالب چارواکو په ځلونو رد کړې او ټینګار یې کړی چې د دغې ډلې د حاکمیت په خاوره کې هیڅ ترهګره ډله فعالیت نه کوی. طالب چارواکو هم له افغانستان څخه د تروریستي ګواښونو په اړه اندیښنه د دې ډلې د حکومت پر ضد د لویدیځ تبلیغاتي جګړه بللې او ځینې استخباراتي سازمانونه یې په هیواد کې د داعش ترهګرې ډلې په ملاتړ تورن کړي دي. البته افغان سیاسي کارپوهان هم وايي چې د طالبانو تر واک لاندې افغانستان کې د تروریستي ګواښونو په اړه د ځینو راپورونو صداقت شکمن دی. حقیقت دا دی چې اوس په هیواد کې عامه امنیت ټینګ شوی او په تیرو دوو کلونو کې د ترهګریزو بریدونو کچه د پام وړ کمه شوې ده. په داسې یوه حالت کې یو شمېر کارپوهان له افغانستان څخه د تروریستي ګواښونو په اړه لویې اندېښنې د هېواد د وضعیت د تورولو لپاره یو ډول استخباراتي کمپاین ګڼي. په عین حال کې، هغه څه چې د نړیوالو پام کم دی په افغانستان کې د ناامنۍ او احتمالي تروریستي ګواښونو له عواملو سره معامله ده. د دې عواملو څخه ځینې داخلي ریښې لري او د یو باثباته، ځواکمن او ټول شموله حکومت له نشتوالي څخه سرچینه اخلي. د افغانستان څو قومي او کلتوري ټولنې ته په پام سره دا څرګنده ده چې د توکمیز طبیعت او سیاستونو لرونکي دولتونه نشي کولی د ټولو قناعت ترلاسه کړي او په ملي ملاتړ سره په هیواد کې له ترهګرۍ او ډار اچونې سره مبارزه وکړي. په افغانستان کې دننه بې ثباته اقتصادي وضعیت باید د هیواد د امنیت او ثبات د تامینولو لپاره د یو مهم عامل په توګه له پامه ونه غورځول شي. په داسې حالت کې چې د هېواد تر نیمايي زیات نفوس د فقر تر کرښې لاندې ژوند کوي، د ټولنې له بې وزله طبقو څخه د ترهګرو ډلو استخدام به تر بل هر وخت ډېر ممکن وي او د ترهګرو صفونه به د بې وزلو او بې روزګاره عناصرو له برکته وده وکړي. په هر صورت، د افغانستان د وضعیت په اړه ځینو اندیښنو ته لنډه کتنه دا ګونګوسې هم را منځته کوي چې ځینې لویدیځ هیوادونه او د هغوی سیمه ییز شریکان هڅه کوي چې د هیواد وضعیت په تورې رڼا کې په انځورولو سره خپلو راتلونکو مداخلو ته لاره هواره کړي او یو ځل بیا د نړۍ افکارو ته د تروریزم پدیده په سیمه او افغانستان کې د خپل شتون لپاره د عذر په توګه وړاندې کړي.