د افغانستان د ژغورنې ملي شورا اعلان وکړ چې طالبان د کورني او نړیوال مشروعیت د نشتوالي له امله په بهر کې د افغانستان د سیاسي استازو په اړه د پرېکړې واک نه لري او په دې برخه کې د دوی دریځ باطل او د تطبیق وړ نه دی. د بهرنیو چارو وزارت د طالبانو د وروستۍ پرېکړې په غبرګون کې چې په ۱۱ اروپايي هېوادونو، کاناډا او استرالیا کې د افغان سفارتونو د قونسلګرۍ اسناد نه منظوروي، دغې شورا غوښتنه کړې چې دغه سفارتونه دې د افغانستان د اتباعو خدمت ته دوام ورکړي. د ملي مقاومت شورا له کوربه هېوادونو هم غوښتي چې د افغان مامورینو د هغو ډیپلوماټانو ملاتړ وکړي چې له طالبانو سره اړیکې نه لري. دغې شورا ټینګار کړی، چې طالبان د ترهګرو ډلو د ملاتړو په توګه فعالیت کوی او له هغوی سره تماس د کوربه هېوادونو امنیت ته ګواښ پېښولی شی. له بلې خوا د طالبانو د بهرنیو چارو وزارت اعلان کړی چې په دغو هیوادونو کې د افغانستان د سفارتونو له خوا برابر شوي قونسلګرۍ خدمات په رسمیت نه پیژني او ټینګار یې کړی چې د دغه ادارې له مرکز سره له همغږۍ پرته فعالیت کوي. په لندن او بلجیم کې د افغانستان د سفارتونو په ګډون ځینو ادارو اعلان کړی چې افغانانو ته به خپلو خدمتونو ته دوام ورکړي. په افغانستان کې د طالبانو له واکمنۍ درې کاله تېر شول، خو هېڅ هېواد د دغې ډلې حاکمیت په رسمیت نه دی پېژندلی. له همدې امله، ډیری سفارتونه او قونسلګرۍ مرکزونه د جمهوري دورې د کارمندانو لخوا اداره کیږي. طالبان دې ته په اشارې سره چې په افغانستان کې سیاسي واک په لاس کې لري وویل چی غواړي په بهر کې د افغانستان د نمایندګۍ مرکزونه دغې ډلې ته وسپاري، خو څو لاملونه د دې غوښتنې د عملي کېدو مخه نیسي. کارپوهان او ډیری هیوادونه په دې باور دي چې طالبان نه یوازې د قانوني لارو واک نه دی ترلاسه کړی، بلکې بشري حقونه یې هم تر پښو لاندې کړي دي. د دې ترڅنګ د دوی حکومت یوه ډله ده او نور توکمونه د افغانستان په اداره کې برخه نه لري. خو د طالبانو مخینه او شته محدودیتونه د دې لامل شوي چې هیڅ هیواد د اسلامي امارت په رسمیت پیژندلو ته ګام نه دی پورته کړی او دوی تل په شک کې پاتې دي. داسې ښکاري چې طالبانو ته د افغانستان د ډیپلوماټیکو مرکزونو او نمایشي دفترونو د سپارلو په اړه د نړۍ د هېوادونو اندېښنې یو عینی حقیقت دی. ځکه طالبان د خپلې واکمنۍ پر مهال نه دي توانېدلي چې د نړیوالې ټولنې باور ترلاسه کړي. طالبان باید په بېلابېلو برخو کې د اعتدال پالیسي په خپلولو کې عملي ګامونه پورته کړي، ترڅو افغانستان په نړیواله ټولنه کې مدغم شي، که نه انزوا او بې باوري به دوام وکړي.