د طالبانو د سیاسي دفتر اداري مرستیال عبدالسلام حنفي په کابل کې د ملګرو ملتونو د ماموریت (یوناما) له مشرې مېرمن روزا اوتونبایوا سره په کتنه کې غوښتنه کړې چې په ملګرو ملتونو کې د افغانستان څوکۍ دې د دې ډلې حکومت ته وسپارل شي. ښاغلي حنفي د بندیزونو د پای ته رسولو له تور لیست څخه د طالبانو د حکومتي چارواکو د نومونو د ایستلو او د نورو بندیزونو د لرې کولو غوښتنه هم کړې ده. هغه وویل: موږ باور لرو چې دا محدودیتونه یوازې ګټه نه لري، بلکې د نړۍ له نورو هېوادونو سره د افغانستان پر اړیکو منفي اغېز کوي، نو پکار ده چې ستونزې او ننګونې په ګډو هڅو او انعطاف سره حل شي. په دې کتنه کې د یوناما مشر هم د افغانستان له خلکو سره د مرستو پر دوام ټینګار وکړ او د طالبانو د حکومت له مشرتابه یې هیله وکړه چې د دغو مرستو د رسولو په برخه کې هر اړخیزه همکاري وکړي. طالب چارواکو تر دې مخکې هم په ملګرو ملتونو کې د افغانستان د استازي د څوکۍ د سپارلو غوښتنه کړې ده. که څه هم د طالبانو او ملګرو ملتونو تر منځ ډېری تبادلې روانې دي، خو له اوسني وضعیت څخه د افغانستان د وتلو لپاره یوه جامع لار نقشه نه ده جوړه شوې. په داسې حال کې چې طالبان په ډېرو قضیو کې د بشري حقونو په سرغړونې او فرقه پالنې تورن دي، خو دوی تل هڅه کوي چې په ملګرو ملتونو کی څوکۍ ونیسي. طالبان له بندیزونو، د دغې ډلې د چارواکو له تور لیست او د ملګرو ملتونو او نړیوالې ټولنې له نه منلو سره مخ دي. له بلې خوا طالبان د بشري حقونو په مسايلو او د يوه جامع حکومت په جوړولو کې چې د دغې ډلې د خلکو غوښتنه ده، نه دي بريالي شوي او په خپلو محدودو سياستونو ټينګار کوي. په داسې حال کې چې طالبان له ډول ډول ننګونو سره مخ دي، هڅه کوي چې د ملګرو ملتونو څوکۍ ته ځان ورسوي، خو داسې ښکاري چې د اوسني وضعیت په دوام سره به په ملګرو ملتونو کې د افغانستان څوکۍ ترلاسه نه کړي ځکه چې د دې ډلې کړنې دوی دې غوښتنې ته د رسیدو مخه نیولې او ملګري ملتونه به د عامه افکارو قضاوت ته ځان نه رسوي؛ نو یوازینۍ حل لاره د اختلافي مسایلو په اړه د طالبانو د تګلارو بدلول دي.