د معمار پرس د خبر له مخې؛ د بشري حقونو د څار سازمان د ښځو د څانګې مرستیالې هدر بار وویل: ملګرو ملتونو د دوحې غونډې ته د طالبانو د جلبولو په خاطر امتیازات یې ورکړي دي چی په دې امتیازاتو کې په غونډه کې د ښځو نه شتون او د ښځو د حقونو او د بشري حقونو د مسلې لرې کول له اجنډا څخه شامل دي. مېرمن بار د ملګرو ملتونو پر دې تګلارې نیوکه وکړه: “دغه سازمان حتی د طالبانو د واکمنۍ پر مهال په افغانستان کې د بشري حقونو د وضعیت په اړه د خپل ځانګړي راپور ورکوونکي څرګند او ټکان ورکوونکی راپور له پامه غورځولی دی.” په پام کې ده چې د ملګرو ملتونو د بشري حقونو ځانګړی استازی ریچارډ بینیټ د سه شنبې په ورځ د دغه سازمان د بشري حقونو شورا ته راپور وړاندې کړي. په دې راپور کې په افغانستان کې له بشري حقونو څخه د پراخې سرغړونې او د طالبانو د حساب ورکولو لپاره د حل لارې ته اشاره شوې ده.