د تاجکستان چارواکو د شانګهای د همکاریو په سازمان کې د افغانستان له ګډون سره د دغه هېواد د مخالفت په اړه د افغانستان لپاره د روسیې د ځانګړي استازي وروستۍ څرګندونې رد کړې.
د معمار پرس د خبر له مخې؛ د تاجکستان د بهرنیو چارو وزارت د یوې اعلامیې په خپرولو سره اعلان کړی چې دوشنبه هېڅکله د شانګهای-افغانستان د همکارۍ سازمان د تماس ډلې چې د دغه سازمان د غړو هېوادونو او افغانستان ترمنځ د خبرو او همکاریو د اسانتیا په موخه جوړه شوې، له بیا پیلېدو سره مخالفت نه کوي. په دغه بیانیه کې راغلي دي: “تاجکستان د شانګهای د همکاریو د سازمان په چوکاټ کې، تل د افغانستان د مسلې په اړه د خبرو اترو پر اړتیا ټینګار کړی او هیڅکله یې د دغې ډلې له فعالیتونو سره مخالفت نه دی کړی.”