د معمار پرس د خبر له مخې؛ د پاکستان لومړي وزير شهباز شريف او د چين ولسمشر شي جين پينګ په ګډه اعلاميه کې د افغانستان د مسئلې په اړه د اړيکو او همغږۍ پر پياوړتيا او په دغه هېواد کې د يوه ټول شموله حکومت پر جوړېدو ټينګار کړی دی. د پاکستان او چین د مشرانو په ګډه اعلامیه کې چې د شنبې په ورځ (د جوزا ۱۹ مه) خپره شوه، له طالبانو غوښتل شوي چې له ترهګرۍ سره پریکنده مبارزه وکړي، اعتدال پالېسي غوره کړي او په افغانستان کې یو ټول شموله حکومت جوړ کړي. د دې ګډې اعلامیې په دوام کې راغلي چې دواړو لورو د افغانستان د مسئلې په اړه د اړیکو او همغږۍ پر پیاوړتیا موافقه وکړه. په خبرپاڼه کې دا هم راغلي: “دواړو لورو هوکړه وکړه چې له افغانستان سره د دوامداره پرمختګ او نړیوالې ټولنې سره د ادغام په برخه کې د مرستې لپاره رغنده رول ولوبوي.”