د طالبانو د سرپرست حکومت ویاند اعلان وکړ چی د طالبانو مشر ملا هبت الله اخندزاده د ۱۴۰۳ مالي کال له پیله دوه میاشتې وروسته د دې کال لپاره د سرپرست حکومت بودیجه تصویب کړه. د معمار پرس د خبر له مخې؛ د طالبانو ویاند ذبیح الله مجاهد نن چهارشنبه (د جوزا ۲مه) په خپله ایکس پاڼه کې لیکلي چې د سږني کال په بودجه کې د خلکو اړتیاوې او لومړیتوبونه په پراخه کچه په پام کې نیول شوي دي. د طالبانو د سرپرست حکومت ویاند زیاته کړه چې د تېر کال په څېر د سږ کال بودیجه د افغانستان له داخلي عوایدو جوړه شوې ده. مجاهد ادعا کړې، چې د طالبانو مشر له هر اړخیزې کتنې وروسته دغه پلان نهايي کړ او د مالیې وزارت ته یې امر وکړ، چې په (عادي او پرمختیايي) پروژو کې دې په شفاف ډول شامل کړي.