د معمار پرس د خبر له مخې؛ د طالبانو د حکومت د صنعت او سوداګرۍ وزارت نن سه شنبه د ثور ۲۵مه اعلان کړه چی د دغه وزارت سرپرست نورالدین عزیزي د یوه لوړ پوړي پلاوي په مشرۍ د دغه هېواد په تاتارستان کې د روسیې او اسلامي نړۍ د اقتصاد په پنځلسمه نړیواله غونډه کې د ګډون په موخه تللی دی. د طالبانو د حکومت د صنایعو او سوداګرۍ وزارت د خبرپاڼې پر بنسټ، د دغه پلاوي سفر د تاتارستان د ولسمشر، رستم مینی خانوف په رسمي بلنه ترسره شو. د روسيې او اسلامي نړۍ پنځلسمه نړيواله اقتصادي غونډه په پنځو ورځو کې د تاتارستان په کازان ښار کې پيلېږي. تر دې مخکې د روسیې سفیر طالب چارواکو ته د کازان په غونډه کې د ګډون بلنه ورکړې وه.