د پاکستان د سوداګرۍ او صنایعو د خونې مشر عاطف اکرام شیخ وايي: د سپین بولدک – چمن لارې دواړو غاړو ته زرګونه موټر بند پاتې دي او اسلام اباد باید دغه پوله ژر پرانېزي. پاکستاني رسنۍ ډان ورځپاڼې د اکرام شیخ له خولې دا خبره کړې ده چی د پاکستان حکومت باید د مالي زیانونو د مخنیوي لپاره دغه لار د سوداګریزو توکو پر مخ پرانیزي. هغه زیاته کړه: “د چمن پوله باید ژر تر ژره پرانیستل شي ترڅو د سوداګرو مالي زیانونه کم شي او د خوراکي توکو او درملو په ګډون د اړتیا وړ توکو ته اجازه ورکړل شي چې له دې پولې تېر شي.” اکرام شیخ د پاکستان دغه عمل یو بشري ناورین بللی دی. دا په داسې حال کې ده چې له څو ورځو راهیسې د طالبانو له لوري دغه لار د ناروغانو پر مخ تړل شوې ده.