افغانستان د ملګرو ملتونو په عمومي اسامبله کې د ملګرو ملتونو د غړیتوب د فیس د نه ورکړې لپاره د کره دلیل د نه وړاندې کولو له امله د رایې ورکولو له حق څخه محروم شو. په هرصورت، که چیرې یو هیواد دا ثابته کړي چې دا په ځانګړي حالت کې دی او نشي کولای د ملګرو ملتونو د غړیتوب فیس ورکړي، کولای شي د رایې ورکولو حق وساتي. د ملګرو ملتونو له خوا د خپاره شوي نوملړ له مخې افغانستان، کوموروس، اکوادور، ساو‌تومه او پرنسپې، سومالیا او وینزویلا هغه شپږ هېوادونه وو چې په تېرو دوو کلونو کې یې د ملګرو ملتونو د غړیتوب فیس نه دی ورکړی. په دې اړه د کوموروس، اکوادور او سومالیا هېوادونه د وضاحتونو په وړاندې کولو سره د دغه قانون په وړاندې په رایه ورکولو بریالي شول، خو افغانستان، اکوادور او وینزویلا د قناعت وړ توضیحاتو د نه وړاندې کولو له امله د رایې ورکولو له حق څخه محروم شول. کارپوهان وايي، چې افغانستان د نورو هېوادونو په پرتله د غړیتوب د فیس د نه ورکړې لپاره کافي دلایل درلودل، خو په ملګرو ملتونو کې د تېر حکومت د استازي (غني) د هڅو نشتوالی د دغه محرومیت لامل شوی دی. په افغانستان کې سیاسي بدلونونه په ملي او نړیوالو ډګرونو کې د ډیرو ګډوډیو لامل شوي دي. له یوې خوا پخوانی حکومت ړنګ شوی او له بلې خوا طالبانو د افغانستان واک نیولی دی. خو په ملګرو ملتونو کې د افغانستان څوکۍ لا هم د جمهوريت د استازي په غاړه ده. که څه هم طالبانو د دغه مقام د ترلاسه کولو لپاره ډېرې هڅې وکړې، خو تر اوسه په دې نه دي بریالي شوي. داسې ښکاري چې نړیواله ټولنه او په ځانګړې توګه ملګري ملتونه د افغانستان په اړه شکمن دي ځکه دوی نه د افغانستان د پخواني استازي په سمه توګه ملاتړ کوي او نه د طالبانو استازي مني. او دا حالت په ملګرو ملتونو کې د افغانستان د خلکو او موقف په ګټه نه دی. له همدې امله ملګري ملتونه باید د افغانستان په اړه د یوې نړیوالې اجماع په اړه فکر وکړي، ترڅو افغانستان نور په شا نه شي.