د معمار پرس د خبر له مخې؛ د طالبانو د حج او اوقافو وزیر نور محمد ثاقب وویل: د حج برخې له مخې به سږ کال ۳۰ زره افغانان د حج فریضې ادا کولو لپاره سعودي عربستان ته ولاړ شي. د طالبانو د حج او اوقافو وزیر ثاقب چې نن یې د دغه وزارت په یوه خبري غونډه کې خبرې کولې زیاته کړه: سږ کال د هر حج ټول لګښت ۳۸۶۵ ډالره دی. خو شیعه زیارت کوونکي له دې رقم څخه ۵۰ ډالره زیات ورکوي. هغه زياته کړه، چې دوه کورني هوايي شرکتونه د دغو حاجيانو د لېږد مسووليت لري. دا په داسې حال کې ده، چې تېر کال د طالبانو د حج او اوقافو وزارت اعلان وکړ، چې د حج په مراسمو کې له افغانستان څخه ۳۰ زره حاجیانو، چې ۸ زره یې ښځې وې، ګډون کړی وو.