د طالبانو د ترانسپورت او هوايي چلند وزارت نن دوشنبه (د دلو ۱۶ مه) وویل چې دواړو لورو د ځمکني او هوايي ترانسپورت په برخه کې د دوه اړخیزو اړیکو پر پراختیا خبرې وکړې. د طالبانو د ډلې د ترانسپورت او هوايي چلند سرپرست وزیر ملا حمیدالله اخندزاده پرون په کابل کښې د ایران د اسلامي جمهوریت د سفارت له سرپرست حسن کاظمي قمي سره وکتل او د دوه اړخیزو ترانسپورتي اړیکو د پراختیا په هکله یې خبرې اترې وکړې. دواړو لورو همدا راز د دوامداره ترانسپورتي همکاریو، د ځمکني او هوايي ترانسپورت په برخه کې د لا زیاتو اسانتیاوو رامنځته کولو، د سړک او ریل ترانسپورت له لارې ایران ته د افغانستان د صادراتو پر زیاتوالي او د افغانستان د سوداګریزو توکو د صادراتو او وارداتو لپاره د چابهار بندر د کارولو په اړه خبرې وکړې.