د طالبانو د اقتصاد وزارت مرستیال د امریکا د دې ادعا په ردولو سره چې ګواکې کابل د مرستو د کارولو لپاره جعلي بنسټونه جوړ کړي، ټینګار وکړ چې د مرستو د ویش په بهیر کې به هیڅ ډول لاسوهنه نه کیږي.
د معمار پرس د خبر له مخې؛ د طالبانو د اقتصاد وزارت مرستیال عبداللطیف نظري په افغانستان کې د جعلي بنسټونو د جوړولو او له بشري مرستو څخه د استفادې په اړه د امریکا د استازو جرګې د بهرنیو اړیکو د کمېټې د مشر مایکل مک کال څرګندونې رد کړې او ویلې چی هیڅ جعلي اداره نه ده جوړه شوې او د مرستو د ویش بهیر هم په شفاف ډول څارل کیږي. نظري په دې اړه وويل: طالبان د مرستندويه موسسو د شفافو فعاليتونو ملاتړ کوي، خو د نړيوالو موسسو د مرستو د ويش په بهير کې يې لاسوهنه نه ده کړې او نه يې جعلي موسسې جوړې کړې دي.