د معمار پرس د خبر له مخې؛ د افغانستان د ملي مقاومت جبهې مشر د ویانا په غونډه کې، له هغو کسانو چې د طالبانو پر ضد دي، وغوښتل چې خپل منځي اختلافات یوې خوا ته کړي او د افغانستان د کړکېچ په اړه یوې ګډې هوکړې ته ورسېږي. احمد مسعود وویل چې د افغانستان د ملي مقاومت جنګونه د یوې ښې لاسته راوړنې سبب شوي دي: د طالبانو د مخالفینو یووالی. دا یووالی د دې ډلې لوړ پوړي چارواکي اندېښمن کړي دي. د طالبانو د مخالفینو غونډه د یکشنبې په ورځ د قوس په ۱۲مه د آسټریا په پلازمېنه ویانا کې پیل شوه. په دې غونډه کې د افغانستان د بېلابېلو سیاسي ګوندونو او ډلو استازي ګډون لري. د دې غونډې موخه د افغانستان د حالاتو څېړل او په دغه هېواد کې د کړکېچ د هواري موندل دي.