د طالبانو ویاند ذبیح الله مجاهد د امریکا ولسمشریزو ټاکنو ته د نوماند ډونالډ ټرمپ د وروستیو څرګندونو په غبرګون کې ویلي چی د افغانستان واکمنه اداره په دغه هیواد کې د بهرنیو ځواکونو حضور ته اجازه نه ورکوي. تر دې مخکې ډونلډ ټرمپ خپلو پلویانو ته ویلي و، چې که ولسمشریزې ټاکنې وګټي، نو د چین د څارنې هڅه به وکړي او د یوې سوداګریزې معاملې د یوې برخې په توګه یې په افغانستان کې د بګرام هوايي اډې کنټرول به ترلاسه کړي. نوموړي دا هم ویلي، چې په افغانستان کې د دې اډې د کارولو اراده نه لري، خو غواړي د چین د څارنې لپاره ترې کار واخلي.