کاناډا یو له لومړنیو هیوادونو څخه و چې د افغانستان د طالبانو له بیا واک ته رسیدو وروسته د زیان منونکو افغانانو لپاره چې د ښځو مشرانو، د بشري حقونو مدافعانو، توکمیزو-مذهبي اقلیتونو او همدارنګه ژورنالستانو په ګډون د بشردوستانه بیا میشتیدنې ځانګړی پروګرام پیل کړ. مارک میلر وویل: زموږ دوامداره ژمنتیا په دې معنا نه ده چې زموږ کار دلته پای ته رسیږي. موږ به له خپلو اصلي ملګرو سره کار ته دوام ورکړو چې زیانمنونکي افغانان وژغورو او په کاناډا کې د نوي ژوند په پیلولو کې مرسته وکړو. هغه د هېواد له اوسېدنکو سره د طالبانو د چلند په اړه هم وويل: د طالبانو لخوا په افغانستان کې د خلکو ویره دوام لري او د افغانانو په حقونو او آزادیو په ځانګړې توګه د ښځو او نجونو اغیزې بې حده دي. په داسې حال کې چې د کاناډا حکومت دغه هېواد ته د افغان کډوالو د لېږدولو په برخه کې د خپل هېواد د ژمنو د ډېرېدو خبره کوي، له تېرو دوو کلونو راهیسې زرګونه افغانان چې د بشري ویزو لپاره یې غوښتي، په ګاونډیو هېوادونو په ځانګړې توګه پاکستان او ایران کې په بدمرغۍ کې ژوند کوي. په ایران او پاکستان کې هغه کډوال چې غواړي کاناډا او نورو هیوادونو ته د لیږد بهیر تعقیب کړي له دغو دوو هیوادونو څخه د اجباري اخراج له پروګرام سره مخامخ شوي دي، چې د دوی د لیږد بهیر ستونزمنوي. د زیان منونکو مهاجرینو د منلو او لیږدولو لپاره د کاناډا اقدام، د هر دلیل لپاره، د ځینو پناه غوښتونکو د ستونزو د حل لپاره به یو ارزښتناک اقدام وي. ځکه چې داسې کسان شته چې د امنیتي او بشري حقونو د دلایلو له امله افغانستان ته نه شي ننوتلی. او که دوی په زور ویستل شي، دا معلومه نه ده چې برخلیکونه یې څه وي. په اوکراین کې د جګړې له پیل سره د افغان پناه غوښتونکو د لېږد او منلو بهیر ورو او ځنډېدلی او دا کار د دې لامل شوی چې هغه کسان چې د کډوالۍ هیوادونو ته د لیږد او داخلیدو لپاره غوښتنلیک لري په مطلق ناڅرګندتیا کې پاتې شي. اوس دغه شمیر مهاجر له اخراج سره مخامخ دي. که لویدیځ هیوادونه چې د پناه غوښتونکو د منلو ژمنه یې کړې وه په خپله ژمنه وفا کړي واي، نو دا شمېر کډوال به د اخراج له ستونزې او تر ټولو مهمه د امنیت په ستونزه کې ښکیل نه وای. په اوسني وضعیت کې تمه کیږي چې د پناه غوښتونکو د ستونزو د حل لپاره به پراخ پروګرامونه پلي شي، تر څو هم هغه کسان چې د لیږد په بهیر کې دي خپل منزل ته ورسیږي او هم د هغو کسانو لپاره چې تراوسه یې په دې برخه کې کوم اقدام نه دی شوي، باید پلان او حل لارې ورته وړاندې شي.