معمار پرس د خبر له مخې؛ په اسلام اباد کې د طالبانو سفارت د چهارشنبې په ورځ (د عقرب ۱۰مه) د پاکستان حکومت ته په یوه بیانیه کې خبرداری ورکړ چې د افغان کډوالو جبري اخراج او ځورول د کابل او اسلام اباد اړیکې له خطر سره مخامخ کوي. د طالبانو سفارت په یوه خبرپاڼه کې لیکلي چې افغان کډوال له پاکستان څخه د راستنېدو پر مهال له ډېرو ننګونو سره مخ دي. په یوه بیانیه کې، سفارت له پاکستان څخه غوښتي چې سمدستي د مهاجرینو جبري اخراج او ځورونې ودروي. پاکستاني چارواکو ویلي، چې په تېرو دوو اونیو کې د تورخم له لارې څه باندې سل زره افغان کډوال افغانستان ته راستانه شوي دي.