د معمار وحدت د خبری آژانس د خبر له مخې؛ د افغانستان پخواني ولسمشر حامد کرزي متحده عربي اماراتو ته د خپل سفر په ترڅ کې د امریکا، انګلستان، قطر او پاکستان له استازو سره د سولې د خبرو د پیل او په افغانستان کې د یوه ټول شموله حکومت د جوړولو په اړه خبرې وکړې. نوموړی بیا د جرمني دوسلدورف ته تللی او له هغه ځایه به ترکیې ته ولاړ شي او هلته به د سیاسي ګوندونو له مشرانو سره وګوري. کرزي دغه سفر د سولې د ماموریت د پلي کولو او د طالبانو له مشرانو سره د تفاهم په هدف کړی دي. هغه ته په افغانستان کې د طالبانو د واکمنۍ له راتګ وروسته له هېواده د وتلو اجازه نه وه ورکړل شوې، خو په دې وروستیو کې طالبانو هغه ته اجازه ورکړه چې له افغانستانه ووځي. د جو بایډن اداره هڅه کوي چې د دوحې د خبرو اترو پروسه د 2024 کال د متحده ایالاتو تر ټاکنو دمخه یوې پایلې ته ورسوي. په همدې حال کې روسي چارواکو له افغان لوري سره په ګڼو ناستو کې ویلي چې دوی د امریکا د سولې د ناکام پلان مخالف دي او غواړي چې د سولې د نوي پلان په جوړولو سره په افغانستان کې د اختلافاتو د حل لپاره اقدام وکړي.