د معمار وحدت د خبری آژانس د خبر له مخې؛ د بهرنیو چارو وزارت ویاند عبدالقهار بلخي تېره شپه (د عقرب ۱۰مه) د یوې خبرپاڼې په خپرولو سره ویلي چې د بهرنیو چارو وزارت سرپرست په کابل کې د قطر له سفیر سره وکتل.

د قطر سفير په دې کتنه کې وويل چې دوى په پام کې لري چې په افغانستان کې د قطر خيريه دفتر پرانيزي او دوی به دا کار د بهرنیو چارو وزارت په موخه ترسره کوي او په دې توګه به له اړمنو، کونډو او یتیمانو سره لازمې مرستې کوي.

نوموړي ویلي، هېواد یې له افغانستان سره د اړیکو د لا پراختیا غوښتونکی دی.

په دې کتنه کې ښاغلي متقي د قطر د خیریه بنسټونو د فعالیتونو د دوام په خاطر د قطر د همکارۍ او د بشپړې همکارۍ ډاډ ورکړ.

نوموړي د یادو مرستو د ویش په اړه هم خپل نظر څرګند کړ او په دې برخه کې یې د اسلامي امارت د همکارۍ ډاډ ورکړ.

د حکومت د بهرنیو چارو وزارت سرپرست د قطر او افغانستان ترمنځ همکاري نه هېرېدونکې وبلله.

قطر د اسلامي امارت یو له هغو ملاتړو هیوادونو څخه دی چې د دوحې د تړون په لاسلیک کې یې د اماراتو او امریکا ترمنځ د منځګړیتوب رول لوبولی دی.