د طالبانو ویاند ذبیح الله مجاهد په افغانستان کې د داعش ډلې د فعالیتونو د زیاتوالي په اړه په افغانستان کې د روسیې د ځانګړي استازي ضمیر کابلوف د نویو څرګندونو په غبرګون کې ویلي چې دغه ډله به اجازه ورنکړي چې افغانستان د داعش ډلې په مرکز بدل شي. د داعش ځالې او دا چې په افغانستان کې د داعش د زیاتوالي اټکل حقیقت نه لري.

د معمار وحدت د خبری آژانس د خبر له مخې؛ ښاغلي مجاهد تېره شپه (۷ اسد) په خپله ټوېټر پاڼه لیکلي: “په افغانستان کې د داعش د پدیدې د زیاتېدو اټکل ناسم او له حقیقت څخه لرې دی.”

ښاغلي مجاهد د روسیې پر استازي نیوکه کړې او لیکلي یې دي: “د داعش د بغاوت کوونکو د کمپاین په اړه اندېښنې پیدا کول دي چې باید ونه شي.”

هغه ټینګار وکړ چې داعش په افغانستان کې مات شوی او د ورکیدو په حال کې دی او د افغانستان اسلامی امارت او خلک به داعش ته اجازه ورنکړی چې په هیواد کې ځالې جوړې کړی.

دا څرګندونې په داسې حال کې کېږي چې د افغانستان په چارو کې د روسیې استازي ضمیر کابلوف ویلي چې په افغانستان کې د داعش ډلې فعالیت زیات شوی او د دغې ډلې د جنګیالیو شمېر له ۲۰۰۰۰ څخه ۶ زرو ته لوړ شوی دی.

هغه وویل، دا وضعیت نه یوازې د افغانستان بلکې د روسیې د متحدینو لکه ایران، پاکستان او چین ملي ګټو ته هم ګواښ دی.