د کډوالو په چارو کې د ملګرو ملتونو عالي کمېشنرۍ وايي، دا بنسټ غواړي په افغانستان کې له هغو کورنیو سره چې د بېلابېلو لاملونو له امله بې‌ځایه شوي، بېړنۍ مرستې ورسره وکړي او سرپناوې ورته برابرې کړي.

یاده کمېشنرۍ زیاتوي، په افغانستان کې بې‌ځایه شوې کورنۍ په ناسم اقتصادي وضعیت کې شپې او ورځې تېروي او په وینا یې هغوی بېړنیو بشري مرستو ته اړتیا لري.

د پناه غوښتنونکو په چارو کې د ملګرو ملتونو عالي کمېشنرۍ زیاته کړې: «په افغانستان کې بې‌ځایه شوې کورنۍ لا هم بشري مرستو ته اړتیا لري. دمګړۍ د پناه غوښتونکو په چارو کې د ملګرو ملتونو کمېشنري هڅې کوي، څو هغو کورنیو ته چې اوس اوس بې‌ځایه شوي سرپناوې جوړې کړي.»

په همدې حال کې د اقتصادي چارو کارپوه نظرمیر زیارمل وايي: «په وروستیو طبیعي پېښو کې چې خلکو هر څه له لاسه ورکړل او هغه مرستې چې تر اوسه د نړیوالې ټولنې یا مرستندویه ادارو له‌خوا شوې دي، د کورنیو د یوې یا دوو میاشتو لګښت دی او دوی ته بسنه نه‌کوي. باید نورې مرستې هم وشي.»

د پناه غوښتنونکو په چارو کې د ملګرو ملتونو عالي کمېشنرۍ په یو لړ ټویټونو کې لیکلي، په لغمان کې یې پر څه باندې ۲ زره بې‌ځایه شویو کورنیو نغدي مرستې وېشلي دي.

له بل لوري، د بشري حقونو څار بنسټ په یوه راپور کې لیکلي، د پکتیکا او خوست زلزله ځپلو ته له فوق العاده ځانګړو شویو مرستو معلولان نه‌دي برخمن شوي.

راپور زیاتوي، معلولان له روغتيايي خدماتو او نورو لومړنیو مرستو بې‌برخې پاتې شوي دي.

د بشري حقونو څار بنسټ په راپور کې زیاته شوې: «معلولان د لومړنیو خوراکي توکو او روغتیايي خدماتو په ګډون له بشري مرستو بې‌برخې شوي دي. معلولان تر نورو ډېر زیانمنونکي دي. په افغانستان کې له شوې زلزلې وروسته د معلولانو د اړتیاوو په تړاو څه نه‌دي ویل شوي او په شویو مرستو کې هم ورته پام نه‌دی شوی.»

د اقتصادي چارو کارپوه فهیم عباسي وايي: «په اوسني وضعیت کې د بانک له لارې مرستې زیاتې اغېزنانکې دي، ځکه چې د بانک کارت او بایومیټریک د تېروتنو مخه نیسي او په راتلونکي کې به د مرسته ورکوونکو لپاره یوه سرچینه وي او په اقتصاد کې د پیسو جریان به د صنعت سکټور پیاوړی کړي او په نهایت کې به دندې رامنځ‌ته کړي.»

د بشري حقونو څار بنسټ د خپلې ټویټر پاڼې له لارې له نړیوالو او مرستندویه بنسټونو غوښتي چې له افغانستان سره مرستې وکړي او د افغان ولس تر څنګ ودرېږي.