له افغانستان سره د نړیوالې ټولنې ۷ میلیارده ډالره مرسته

د افغانستان د بیارغونې لپاره د امریکا د متحدو ایالتونو ځانګړي مفتش یا “سیګار” په خپل نوي راپور کې لیکلي چې نړیوالې ټولنې په نږدې دریو کلونو کې له افغانستان سره اووه میلیارده ډالره مرسته کړې ده. سیګار په دې راپور کې په افغانستان کې د ملګرو ملتونو د سرمنشي د ځانګړي استازي په حواله زیاته کړې ده چی د امریکا متحدو ایالتونو له افغانستان سره شاوخوا ۲،۹ میلیارده ډالره مرسته کړې چې بشري او پرمختیايي مرستې پکې شاملې دي. د دغه راپور پر بنسټ، له دغو مرستو سره سره افغانستان لا هم له اقتصادي بحران سره مخ دی. سيګار زياته کړه، چې د روان کال تر جون مياشتې پورې په سويس کې د افغانستان د پانګې اچونې په صندوق کې د افغانستان شتمني هم ٣،٨٤ ميليارده ډالرو ته رسېدلې ده.