د طالبانو سرپرست حکومت د حماس د دفتر د مشر اسماعیل هنیه وژنه او شهادت غمجن بللی او ویلي یې دي چې د هنیه شهادت د اسرائیلو د تباهۍ لپاره یوه ژمنه ده.
د معمار پرس د خبر له مخې؛ طالبانو نن چهارشنبه (د اسد ۱۰مه) په تهران کې د حماس د سیاسي دفتر د مشر اسماعیل هنیه د شهادت په غبرګون کې یوه اعلامیه خپره کړه او وویل چی شهادت یوه پراخه دروازه ده چې له لارې یې خدای خپل محبوبان قبلوي. طالبانو په دې خبرپاڼه کې زیاته کړې، چې د اسماعیل هنیه شهادت؛ د حماس مشر د ملت لپاره یو لوی غم پریښی خو په عین حال کې به د غاصب صهیونیسټانو د تباهۍ ژمنه وي. طالبانو ویلي چې د نوموړي په شهادت د نوموړي کورنۍ او اسلامي امت ته د تسلیت مراتب وړاندې کوو.