د طالبانو دفاع وزیر: دښمنان غواړي په افغانستان کې بې باوري او نفاق رامنځته کړي

د معمار پرس د خبر له مخې؛ د طالبانو د دفاع وزیر ملا یعقوب مجاهد ویلي، چې دښمنان هڅه کوي د دې ډلې تر منځ بې باوري رامنځته کړي. نوموړي د سه شنبې په ورځ د کابل د تخنیکي او مسلکي زده کړو د ریاست د محصلینو د فراغت په مراسمو کې د وینا پر مهال وویل: له طالبانو څخه باید بې باوري، بې اتفاقي او متقابلې تباهي لیرې شي. ملا یعقوب او سراج الدین حقاني د طالبانو له جګپوړو شخصیتونو څخه دي، چې ویل کیږي د دې ډلې د تګلارو په اړه اختلاف لري. د طالبانو یووالی او اطاعت د دغې ډلې د مشر د وینا له مهمو موضوعاتو څخه دی. د جوزا د میاشتې په پای کې ملا هبت الله د اختر په مناسبت په یوه غږیز پیغام کې د طالبانو تر منځ د اختلافاتو په اړه اندیښنه څرګنده کړه او ویې ویل چې دی چمتو دی چې له مشرتابه څخه ګوښه شي، خو طالبان باید خپل اختلافات پای ته ورسوي.