اوچا: د افغانستان نیمايي نفوس عاجلو مرستو ته اړتیا لري
د معمار پرس د خبر له مخې؛ د ملګرو ملتونو د بشري چارو د همغږۍ دفتر (OCHA) د دغه سازمان امنیت شورا ته په یوه نوي راپور کې په افغانستان کې ناوړه بشري وضعیت په ګوته کړی او اعلان یې کړی چې د دغه هېواد ۵۰ سلنه وګړي د ژوندي پاتې کېدو لپاره عاجلو بشري مرستو ته اړتیا لري. د امنیت شورا ته په وړاندې شوي راپور کې د OCHA لوړپوړي چارواکي لیزا ډوټن په افغانستان کې د وضعیت د خرابیدو او د نړیوالې ټولنې د بیړني اقدام په اړه خبرې کړې دي. ډوټن زیاته کړه: «د افغانستان نیمایي وګړي د فقر تر کرښې لاندې ژوند کوي. له هرو څلورو افغانانو څخه یو یې نه پوهیږي چې خپل راتلونکی خواړه چیرته ترلاسه کړي. نږدې درې میلیونه ماشومان د لوږې په سخت پړاو کې دي. هغه په افغانستان کې د میلیونونو خلکو لپاره د بشردوستانه مرستو په بیړنۍ اړتیا باندې د ټینګار په ترڅ کې له نړیوالې ټولنې وغوښتل چې د OCHA د غوښتنو په بشپړ تمویل سره د دغه هیواد له خلکو سره د مرستې لپاره بیړه وکړي.