د افغانستان د فوټبال ملي لوبډله به د کویټ له لوبډلې سره مخامخ شي

د معمار پرس د خبر له مخې، دغه لوبه به نن (سه شنبه د جوزا ۲۲مه) د کابل پر وخت د شپې ۸:۱۵ بجې د کویټ په صباح السالم لوبغالي کې ترسره شي. د افغانستان د فوټبال د ملي لوبډلې مشر روزونکي اشلي ویسټ ووډ د کویټ پر وړاندې د خپلې لوبډلې له لوبې مخکې په یوه خبري غونډه کې وویل چې زده کوونکي یې چمتو دي چې د اسیا د فوټبال له یوه ځواک سره مخامخ شي. هغه وويل، دوى هڅه کوي، چې د افغانستان د فوټبال ملي لوبډله تاريخ جوړ کړي او نړيوال جام او د اسيا هېوادونو جام ته لاره پيدا کړي. که افغانستان دا لوبه وګټي نو د اسیا د ملتونو جام او نړیوال جام ته به د غوراوي پړاو ته ولاړ شي.