د خوړو نړیوال سازمان: په افغانستان کې سیلاب ځپلي اوږدمهاله مرستو ته اړتیا لري

د معمار پرس د خبر له مخې، په افغانستان کې د ملګرو ملتونو د خوړو د نړیوال سازمان (WFP) مرستیال ویاند ضیاالدین صافی وايي چی په افغانستان کې سیلاب ځپلي اوږدمهاله مرستو ته اړتیا لري. ښاغلي صافي زیاته کړه: “اوس مهال، زموږ د ارزونې ټیمونه په غور، فاریاب، هرات او مزار کې دي. د هغوی راپورونه به موږ سره مرسته وکړي چې اړینې مرستې سیمو ته ولېږو.” په تیرو دوو اونیو کې د افغانستان په شمال، شمال ختیځ او لویدیځ کې یو شمیر ولایتونه د سختو بارانونو او مرګوني سیلابونو شاهدان وو چې په پایله کې یې په سلګونو تنه مړه او په زرګونو نور ټپیان او یا هم زیانمن شوي دي.