په پکتیا کې د طالبانو او پاکستان په سرحدي جګړه کې ۱۸ تنه وژل شوي او ټپیان شوي دي

د خلکو سرچينې د جمعې په ورځ د ثور په ۲۸مه اعلان وکړ چې د پکتیا د ډنډپټان ولسوالۍ په خرلاچي سرحدي سیمه کې د طالبانو او پاکستاني پوځیانو ترمنځ د نښتو په دوام کې په دې ولسوالۍ کې ګڼو ملکي وګړو ته مرګ ژوبله اوښتې ده. ځايي سرچينې وايي، چې د ډنډپټان ولسوالۍ پر ځينو سيمو د پاکستاني پوځيانو د درنو ډزو له امله پنځه ملکي وګړي وژل شوي او ١٣ نور ټپيان دي. په دغو بریدونو کې په وژل شویو کې دوه ماشومان او یوه ښځه هم شامله ده. په همدې حال کې سرچینو تایید کړې چې په دغه نښتو کې درې طالبان ټپیان شوي دي. دسرچينو له مخې په دغه سيمه کې سختو نښتو په لسګونو کورنۍ دخپلو کورونو پريښودو ته اړ کړي دي. په همدې حال کې له څلورو ورځو راهیسې د پکتیا ولایت په سرحدي سیمو کې د طالبانو او پاکستاني پوځیانو ترمنځ جګړه روانه ده. تر اوسه د طالبانو حکومتي چارواکو په دې اړه څه نه دي ویلي.