په افغانستان کې ویجاړونکي سیلابونه؛ د قربانیانو شمیر مخ په ډیریدو دی

د پرلپسې اورښتونو په پایله کې د بغلان، تخار، غور، سمنګان، بدخشان، غور، فراه او هرات په ګډون د هېواد په یو شمېر ولایتونو کې سخت سېلابونه راوتلي، چې ډېر ځاني او مالي زیانونه یې اړولي دي. که څه هم د دغو پېښو د قربانیانو کره شمېره نه ده خپره شوې، خو سیمه ییزو سرچینو د قربانیانو شمېر تر ۲۰۰ ډېر ښودلی دی. د سېلاب شدت دومره ويجاړ و چې د زيان اندازه يې ډېره پراخه ده. د طالبانو له پېښو سره د مبارزې چارواکي وايي، چې د دغه ویجاړونکي سېلاب د مرګ ژوبلې کچه لومړنۍ ده او د دې د زیاتېدو احتمال شته. تېره میاشت د طالبانو له پېښو سره د مبارزې وزارت اعلان وکړ، چې په بېلابېلو ولایتونو کې د سېلابونو له امله لږ تر لږه ۱۰۰ تنه مړه شوي دي. سېلابونو سلګونه کورونه نړولي او زرګونه کسان يې بې کوره کړي دي. یوازې په بغلان ولایت کې په “مرکزي بغلان” کې ۵۰۰ کورونه ویجاړ شوي او اوسېدونکي یې بې کوره شوي دي. د پلخمري ښار په سلګونو نور کورونه هم ویجاړ شوي دي. د طالبانو چارواکو د سېلابونو له امله د اوښتو زیانونو ته په اشارې سره له زیانمنو شویو سره د مرستې لپاره له هېوادونو او نړیوالو سازمانونو د مرستې غوښتنه کړې ده. که څه هم طالبانو اعلان کړی، چې له سېلاب ځپلو سره د مرستې لپاره یې په ټول توان سره اقدام کړی، خو د مرستندویه ځواکونو محدودو امکاناتو او کمو امکاناتو دوی له سترې ننګونې سره مخ کړي دي. سېلابونه د هېوادوالو د مرګ ژوبلې ترڅنګ خلکو او هېواد ته ستر مالي زیانونه هم اړوي. د دې په پام کې نیولو سره چې د هیواد ډیرې سیمې د سیلابونو له خطر سره مخ دي، د مخنیوي تدابیر باید ونیول شي ترڅو په راتلونکي کې د داسې ناوړه پیښو شاهدان نه شو. ملګري ملتونه او مرستندویه سازمانونه باید د سیلاب ځپلو سره د مرستې لپاره بیړني اقدامات وکړي ترڅو د خلکو کړاوونه کم شي. په هرصورت، دا هیڅکله ممکنه نه ده چې په دې پیښو کې د عزیزانو له لاسه ورکولو تاوان جبران شي.