د بښنې نړیوال سازمان: د افغانستان په پوهنتونونو کې نجونې د طالبانو د ځورونې له امله زدکړي پرېږدي
د بښنې نړیوال سازمان د افغانستان د وضعیت په اړه په خپل تازه راپور کې ویلي چې په افغانستان کې د طالبانو د زور زیاتي له امله زیاتره ښځینه زده محصلین زدکړي پرېږدي.
د معمار وحدت د خبری آژانس د خبر له مخې؛ دغه سازمان زیاته کړې، چې د افغانستان په پوهنتونونو کې ښځینه محصلانې د جامو د محدودیت او د طالب چارواکو د ناوړه چلند له امله ځورول شوې او وتلو ته اړې شوې دي.
د بښنې نړیوال سازمان وايي، سږ کال په پوهنتونونو کې کمې نجونې نوم لیکنه کري دي.
د بریښنا د مستعار په نوم یوې ښځینه محصلې دغه سازمان ته وویل چې د پوهنتون امنیتي ساتونکي تل پر نجونو چیغې وهي چې “خپلې جامې سمې کړئ!خپله چادري په سمه توګه واغوندئ.”
بریښنا وايي، چې د طالب یوه ساتونکي په وېرونکي غږ ورته وویل: «پتلون ته یې وګوره. ولې دي پښې ښکاري؟
دې محصلې زیاته کړه: یوه ورځ زموږ د ډیپارټمنت آمر ټولګي ته راغی او نجونو ته یې وویل چې خپل ځان ته پام کوئ. موږ یوازې هغه وخت ستاسو ساتنه کولای شو چې تاسو د پوهنځي په ودانۍ کې یاست. که د طالبانو غړي هڅه وکړي چې تاسو ته زیان ورسوي یا تاسو ځوروي، موږ نشو کولای چي مخنیوی وکړو.
د دغه راپور پر بنسټ، طالبانو ښځینه محصلینو ته خبرداری ورکړی، چې که د دې ډلې فرمانونه عملي نه کړي، کارتونه به یې لغوه او له پوهنتونه به وشړل شي.
دغه راز د کابل پوهنتون یوه استاد په دې راپور کې ویلي چې د طالبانو د امر په معروف او نهي له منکر چارو وزارت محتسبین د پوهنتون په دروازو کې دریږي چي وګوري نجونې څنګه پوهنتون ته ننوځي.
دغه پوهاند وايي، که د دې وزارت د چارواکو له خوا د دغو نجونو له ډلې څخه د یوې نجلۍ جامې یا چلند ونه منل شي، نو په خپله خوښه به دغه محصله له پوهنتونه وباسي.