د قزاقستان د سفیر او په هرات کې د طالبانو د والي ترمنځ د دواړو هېوادونو ترمنځ د سوداګریزو اسانتیاوو د زیاتوالي په اړه خبرې
د معمار پرس د خبر له مخې، د طالبانو د کورنیو چارو وزارت مطبوعاتي دفتر د یوې خبرپاڼې په خپرولو سره ویلي چې د هرات والي نور احمد اسلامجار په افغانستان کې د قزاقستان له سفیر علیم خان یاسین ګولدیف سره وکتل. د دغه خبرپاڼې دڅرګندونو له مخې: د قزاقستان سفير له اسلامجار سره په هرات ولايت کې وکتل او د دواړو هېوادونو تر منځ د سوداګریزو اسانتیاوو پر زیاتوالي خبرې کړي دي. دا په داسې حال کې ده چې ټاکل شوې په نږدې راتلونکي کې په قزاقستان کې سوداګرۍ د نوې لارې د رامنځته کولو په هدف د افغانستان، ترکمنستان او قزاقستان ترمنځ درې اړخیزه غونډه جوړه شي. له بلې خوا د طالبانو حکومت هم اعلان کړی چې د قزاقستان په ګډون د منځنۍ اسیا هېوادونو ته به خپل درې سفیران واستوي. تر اوسه هیڅ هیواد د طالبانو حکومت په رسمیت نه دی پیژندلی. خو د سیمې د هېوادونو او طالبانو ترمنځ سوداګریزې او دیپلوماتیکې اړیکې روانې دي.