په کابل کې د نامعلومو وسله والو له خوا یو پنجشیري ځوان په ډزو وژل شوی دی

په کابل کې عامه سرچینې وايي چې نامعلومو وسله والو په کابل ښار کې یو ۲۴ کلن ځوان په ډزو وژلی دی. سرچینه تاییدوي، چې دغه ځوان امیر حسین نومیږي او د پنجشیر ولایت اصلي اوسیدونکی و او د یکشنبې په شپه شاوخوا ۹ بجې د خیرخانې له درېیمې برخې څخه د «سرک دانش» په سیمه کې د وسله والو له لوري وژل شوی دی. د امير حسين خپلوان وايي، چې تېره شپه ناپېژاندو وسله والو د کابل ښار په خيرخانې سيمه کې د دوى کور ته څېرمه په ډزو وژلى دى. دوی زیاتوي چې هغه په ​​سر او مخ دومره ویشتل شوی چې د پېژندلو وړ نه دی. طالبانو تر اوسه په دې اړه څه نه دي ویلي.