د طالبانو وياند په غور کې د طالب ځواکونو له خوا د يوې ځوانې نجلۍ تښتول تاييد کړل

د معمار پرس د خبر له مخې؛ د طالبانو ویاند ذبیح الله مجاهد دا خبره تایید کړې ده چی د دې ډلې ځواکونو په غور ولایت کې یوه ۱۷ کلنه نجلۍ په زوره له ځانه سره بیولې. د طالبانو وياند وايي، د دې ډلې يو شمېر هغه چارواکي يې نيولي، چې له ځوانې نجلۍ سره يې ناوړه چلند کاوه. ذبیح الله مجاهد په خپره شوې غږیزه فایل کې زیاته کړې، چې دا قضیه د ناوې د مهر پر سر د کورنۍ شخړې پر بنسټ رامنځته شوې ده. دا په داسې حال کې ده، چې سرچينې ويلي، چې تېره ورځ (شنبه د حمل ٤مه) د غور ولايت د پسابند ولسوالۍ په نورک کلي کې يوه ١٧ کلنه نجلۍ د طالبانو له لوري په زوره وتښتول شوه او د شاه ولي په نوم يې له يوه وسلوال سره واده وکړ.