په امنیت شورا کې د طالب چارواکو د معافیت او د سفر د بندیز د مودې د غځولو پر سر اختلاف
د دغه سازمان د امنیت شورا غړي د سفر د معافیت د مودې غځولو او د ۱۳ طالب چارواکو د سفر د بندیز په اړه اختلاف لري.
د معمار وحدت د خبری آژانس د خبر له مخې؛ د الجزیرې خبریال اماندا پرائس د چهارشنبې په شپه د اسد د ۲۷مې په یوه ټویټ کې د امنیت شورا د ډیپلوماټانو په حواله لیکلي دي: «د روسیې او چین وړاندیز د ۱۳ طالب چارواکو د سفري بندیز معافیت د ۹۰ ورځو لپاره تمدید نن د بریتانیا، فرانسې، البانیا او ایرلنډ له خوا رد شو.»
پرائس زیاته کړه، “چین او روسیې د امریکا هغه وړاندیز رد کړ چې د شپږو نورو طالب چارواکو لپاره یې یوازې قطر ته د سفر کولو لپاره د سفر بندیز معاف کړی و.”
د روسیې او چین له خوا د ۱۳ طالب چارواکو د سفر د بندیز د معافیت د غځولو وړاندیز یوازې د چین او روسیې په ګډون د سیمې هېوادونو پورې محدود دی.
ټاکل شوې د طالبانو د سفري بندیز معافیت د جمعې په ورځ پای ته ورسیږي.
دا په داسې حال کې ده، چې تر دې مخکې د ملګرو ملتونو امنیت شورا د طالبانو دوه نور چارواکي د سفر د بندیز د تمدید له لیست څخه ایستلي وو.