د طالبانو د کورنیو چارو وزارت اعلان وکړ چې هره ورځ به ۱۰ زره پاسپورتونه د هېواد اتباعو ته وېشي

د معمار پرس د خبر له مخې؛ د طالبانو د کورنیو چارو وزارت ویاند عبدالمتین قانع نن (پنجشنبه د حمل ۹ مه) په کابل کې یوې خبري غونډې ته وویل: د ۱۴۰۲ کال په وروستیو شپږو میاشتو کې ۸۳۷۰۰۰ پاسپورټونه غوښتونکو ته ویشل شوي دي. دا خبره د طالبانو د کورنیو چارو وزارت ویاند کړې ده چی د پاسپورتونو عمومي ریاست اوس مهال د هېواد اتباعو ته ۱۰ زره پاسپورټونه وېشي. د طالبانو د کورنیو چارو وزارت ویاند دا هم وویل چې په نږدې راتلونکي کې به د کابل په دریو نورو زونونو کې هم د پاسپورټونو د وېش لپاره درې نورې څانګې جوړې کړي. په همدې حال کې د هېواد ډېری هغه اتباع چې د پاسپورټ ترلاسه کولو لپاره یې انلاین نوم لیکنه کړې، وايي چې د پاسپورټ ترلاسه کولو لپاره له یو کال څخه زیات وخت نیسي.