پوتین: افراطي اسلامپالو په مسکو کې د تروریستي برید مسوول و

د روسیې ولسمشر ولادیمیر پوتین په خپلو تازه څرګندونو کې په مسکو کې د کنسرت پر تالار د برید عاملین «راډیکال اسلامپالي» بللي دي خو هغه یو ځل بیا تکرار کړه چې اوکراین په دې وژونکې ډزې کې لاس درلود چې ۱۳۹ تنه پکې ووژل شول. خو پوتین وویل چې اوکراین په یو ډول نه یو ډول په دې بریدونو کې لاس درلود. د روسیې ولسمشر په یوه تلویزیوني وینا کې وویل: “موږ پوهیږو چې دا بریدونه د افراطي اسلامپالو لخوا ترسره شوي چې اسلامي نړۍ یې هم له پیړیو راهیسې ورسره جګړه کوي.” دا څرګندونې په داسې حال کې کېږي چې داعش د مسکو په څنډه کې د جمعې د ورځې د کنسرت په تالار کې د برید مسوولیت منلی و. په دغه برید کې لږ تر لږه ۱۳۹ کسان ووژل شول او لږ تر لږه ۱۸۰ نور ټپیان شول.