امریکايي سناتور: موږ باید په افغانستان کې داعش ته ماتې ورکړو

یو جګپوړي امریکايي سناتور په سیمه کې د داعش د فعالیتونو په اړه د زیاتېدونکو اندېښنو په لړ کې په افغانستان کې د دغې ډلې پر مرکزونو د برید غوښتنه وکړه. د معمار پرس د خبر له مخې؛ جګپوړي جمهوري غوښتونکي سناتور لینډسي ګراهام په “X” کې یو پیغام خپور کړی او لیکلي یې دي: مخکې له دې چې ډېر ناوخته شي، موږ باید د افغانستان په خراسان کې د داعش پر اهدافو سخت بریدونه وکړو او د هغوی عملیات ګډوډ کړو. دا څرګندونې په داسې حال کې کېږي چې په مسکو کې د داعش ډلې د برید ټول برید کوونکي د تاجکستان اتباع وو او داسې شواهد نشته چې بریدګر دې په افغانستان کې وي او یا دې دغه برید په دغه هېواد کې پلان کړي وي.